والمصحف فى العربيه

من الحاجات اللى بلاحظها دايما فى مجتمعنا فكره البركه .. والبركه فى حياتنا بتمثل شيىء كبير جدا  حتى لو كانت بركه شكليه مش فعليه .. اتذكر قبل زواجى اخت مراتى طلبت منى مصحف كبير ولما سألتها عن السبب قالت عشان تحطه فى اوضه النوم مفتوح على السرير عشان البركه !! هو دا شبىء جميل بس الحقيقه انا مش فاهم ايه علاقه مصحف مفتوح بالبركه !! البركه الحقيقه فى المصحف نلاقيها لما نقراه و نتفكر فى اياته ومعانيها و نفهم احكامه وننفذ اومره وننتهى عن نواهيه .. هى دى البركه الحقيقه .. البركه فى المفهوم والتطبيق مش فى الورق نفسه .

قيس على دا كل حاجه فى مجتعنا لها علاقه بالبركه .. حتلاقيها متعلقه بالشكل مش بالهدف من وارها .. فمثلا تلاقى سواق الميكروباص او التاكسى حاطط فى الدرج او فى الرف قدامه او على التابلوه مصحف صغير قديم وعليه تراب حوالى سنه .. ولما تيجى تشيله يقولك " يا اخى شيلته ليه ... حطه عشان البركه !!" طب يا اخى اختشى على دمك ونضفه حتى مش بقولك اقرا فيه .. انما يسيبه محطوط و معرض للشمس والتراب و العفره ومايفكرش حتى ينضفه مش انه يقرا فيه .. و جاى تقولى بركه .. اه يا راجل يا .......... يا بركه

والموضوع مش بيقف بس عند سواقين الميكروباصات  او التكاسيات طب دول ممكن نديهم مبرر ، مشغول ياعينى طول اليوم بيسوق ومش فاضى يمسحه ولا فاكر اصلا انه موجود  ماااااااشى يا سيدى حديك عذرك ، إنما اصحاب العربيات الملاكى ايه عذرهم ؟؟ تركب جنب الواحد منهم تلاقيه مروق العربيه ومنضفها و مخليها على سنجه عشره وناقص يقلعك الجزمه قبل ما تركب و تلاقيه حاطط المصحف جنب الكاسيت ورا فى نص العربيه من عند القزاز و الشمس  مغيره لونه وورقه متنى و عليه تراب السنين و مش مكلف نفسه حتى ينضفه .. ولما تيجى مجرد تلمسه تلاقيه يتخض و يبرق لك كانك على وشك فعل امر عظيم و يقولك بصوت مخيف " بتعمل إيه ؟؟ حتوديه فين .. خليه موجود عشان البركه " !!!    يا اخى طب زى ما نضفت العربيه امسحه حتى ، لا وكمان حاطه جب السماعات و تلاقيه مشغل  اغانى شعبيه او اجنبيه هو نفسه مش فاهم كلماتها اللى ممكن تكون فيه كفر والحاد شغاله جنب المصحف !! يعنى لا مقامه ولا مكانته ولا تقديره يتحط فى مكان زى دا

والمهم الأكاده تلاقى الواحد اول ما يحطه يقولك عشان لما ابقى فاضى كدا اقعد اقرا فيه ، وطبعا دا مابيحصلش لإنه اول ما يفضى يروح يمسك موبايله يقعد يبص فيه ، يا جدعان داحنا بقينا بنبص فى موبايلاتنا حتى واحنا قاعدين فى بيوتنا و على القهوه وسط اصحابنا عايزين تقنعونى انه خلاص الإيمان والورع والتقوى مقطعين بعضهم لدرجه انه حتقرأ المصحف وانت فى العربيه ، طب إقرأه وانت فى بيتك الأول .... عالم مستفزه يا جدع

وعلى سيره القهوه الأمر ماختلفش كتير تلاقي الصبى ولا المعلم مشغل قناه القران الكريم و موطى الصوت وماحدش سامعها او معلى الصوت وماحدش برضه سامعها ، كل واحد فى ملكوته ، اللى بيشرب شيشه واللى بيشرب شاى وقهوه والى بيكلم صحابه واللى بيلعب فى الموبايل ، ولا حد باصص اصلا على الشاشه ولا حد سامعها ويجى يقولك عشان البركه!! .. على النعمه انتوا حتجنوا امى

لا وتلاقيه اول ما القران يخلص يقوم محولك على قناه المولد او شعبيات تبص تلاقى الرقاصه فى وشك هههههههههههههههههه كانه بيقولك خلاص ادينا ادينا ربنا حقه ناخد احنا حقنا بقه مع شويه هيصه و شخلعه ، على النعمه الناس دى حافظه مش فاهمه

والأمر مش واقف بس على المصحف لا حتى اصحاب الديانات الاخرى فممكن تلاقى مسيحيه داخله بالصليب الحمام عادى جدا ... اللى هو ازاى يعنى هو مش الصليب دا مقدس ؟ ازاى تدخلى به الحمام والحمام مكان نجس .. برضه مش فاهم

واضح انه فى حاجات كتير مابقتش مفهومه والاحسن ماتشغلش دماغك عشان ماتجنش لانك لو شغلتها قول على نفسك يا رحمن يا رحيم

هات يابنى حجر المعسل وشوف الزباين و شغلنا الدش على القرأن الكريم عشان البركه

كركركركركركركر

خالد الحداد  8/11/2017

معلش أصل عندنا فرح

فى يوم كنت قاعد بذاكر فى امان الله و فجاه وبدون سابق انذار لقيت صوت سماعات عالى قوى فى العماره اللى جنبى .. و لما سألت قالولى اصل عندهم فرح و لما روحت اطلب منهم يوطوا الصوت شويه لقيتهم بيقولولى " معلش أصل عندنا فرح !! ".

ظاهره الصوت العالى للدلاله على الفرحه اصبحت من المظاهر الغريبع التى لا افهمها .. فما هى العلاقه بين الصوت العالى و الفرحه ؟؟ فتلاقي فى الزفه كلاكسات بتضرب بوصت عالى عالى وبطريقه عصبيه تنرفزك انت شخصيا لاومش عربيه واحده دا انت تلاقيها كذا عربيه بتضرب كلاكساتها ولا بتراعى الساعه ولا المكان ولا اى حاجه خالص . فتلاقيهم مثلا وهم بيروحوا عرسان الساعه 2 ولا 3 بليل يزعجوا كل الجيران بدون مراعاه لآى حد خالص .. طب ليه يا عم ؟؟ إنت عندك فرح .. أنا مالى ؟ تزعجنى ليه ؟ إفرض واحد نايم تعبان او طفل امع طبع عينيها لحد ما نام او واحد بيذاكر .ز غنت عندك فرح إفرح لوحدك مش لازم تزعجنى يعنى ، حتى جوة القاعه اللى كلها متر فى متر لو حد اول عطس اللى ف اخرها حيقوله يرحكمكم الله تلاقى الساماعات عاليه جداا .. طب ليه !! ماهم كلهم فى مكان واحد ، ليه الطرش يعنى ؟ بصراحه مش فاهم .

ومش بس فى الافراح لا دا كمان فى المياتم .ز فتلاقى ميكروفونات متوجه ناحيه البيوت و الصوان شغال و المقرىء بيقرا و الصوت عااااىل جدا .ز طب هل دا مثلا بيخفف عن الميت .؟ هل لما نعلى الصوت كدا الميت حيدخل الجنه ؟؟ هل دا دليل على قوه الدين والتدين وكل ما لصوت يعلى الميت  يبقى متدين اكتر؟؟ طب افرض يا عم انى مسيحى ..  تسمعنى قران ليه ؟ هو انا بسمعك صلواتى فى الكنيسه غصب عنك ؟ يعنى القسيس او الكاهن بيحط سماعات خارجيه و يديها صلاه على الميت فى الميكروفون .. حاجه غريبه والله

وحتى لما تركب ميكروباص تلاقى السواق معلى الصوت جدا ومشغل اغانى شعبيه كلها خبط ورزع وماتفهمش منها كلمه واحده ولما تقوله وطى الصوت شويه يبصلك بقرف كانك بتقوله حاجه عيب .. دا لو وطاه اصلا .. تمشى فى الشارع اغانى المهرجانات تطاردك بصوره مزعجه جداا من شويه مراهقين فى التكاتك و الموتسكيلات وحتى العجل الان فيه سماعات وهات يا صوت عالى.

هل أصبح الصوت العالى إسلوب حياه ودليل على القوه والسيطره و فرض النفوذ  ؟؟

سؤال يستحق التفكير

خـالــد الحـــداد

24/10/2014

مصر قهوه

إن للقهوه المصريه سحرا لا يشعر به الا من اعتاد عليه .. فعندما تجلس عليها ترى كل طبقات المجتمع من عامل بسيط لرجل على المعاش كان ذو سلطه و جاه لطلاب مزوغين من المدرسه لشباب بيتكلم او بيلعب دومينو وطاوله ودلوقتى بلاى ستشين كمان ... ولعل القهوه مش زى الكافيه الذى تجلس فيه على كراسى مريحه و كذلك المشروبات ذات الاسماء الغريبه اللى اراهن ان كان حد فاهم معناها ايه .. فى القهوه تقعد وترى المجتمع كله امامك على طبيعته بكل عفويه و صراحه بدون رتوش او مكياج .. تسمع ام كلثوم او اغانى شعبيه ومهرجانات او تتفرج على ماتشات الاهلى والزمالك او ماتشات اوربيه ماتعرفش اى حد فيها بس المهم اهو التلفزيون شغال على ماتش وخلاص ولا حد باصص عليه خالص او تتفرج على اى قناه هابطه وانت واخد الشيشه فى فمك و تخرج معاها كل اللى فى صدرك من هم او افكار وياسلام بقه لو معاها كوبايه شاى مظبوطه .. تبقى القعده كملت .

كنت لحد سنوات المراهقه عندى اعتقاد راسخ جوايا ان اللى يقعد على القهوه هم الصيع والشباب البايظ عشان كدا افتكر مره لما والدى قالى انه حيقابل واحد على القهوه استغربت جداا كانى فى حاله صدمه حضاريه شديده .

وانت على القهوه تسمع اصوات الدومينو والطاوله بخبط الافيش يرن فى اذنك غير بتاع الطلبات اللى كل شويه تسمعه يقول " وعندك واحد شاى حليب وشيشه هنا " .. عشان كدا القهوه لها فى ضمير المصريين و حياتهم النصيب الأكبر من تمضيه الوقت .. فكل واحد هربان من بيته او من وجع الدماغ بتاع العيال يقعد على القهوه .. وبالتالى اصبحت ملتقى جميع طبقات المجتمع . وخد بالك انا هنا بتكلم على القهوه العاديه مش عن الكافيهات اللى طلعت بشكل مريح شويه عشان تاخد فلوس اكتر من الناس

والدليل ان القهوه اخذت نصيبا كبيرا من حياه المصريينانه هناك قهاوى اشتهرت جداا ولعل اشهرهم قهوه الفيشاوىى فى القاهره وقهوه فاروق فى الاسكندريه .

كانت القهوه  زمان ملتقى للسياسين والمثقفين و كانت بتتنقاش عليها القضايا السياسيه والوطنيه لمصر . بل ككان بعض المرشحين للمجالس النيابيه يعقد برنامجه الانتخابى فى القهاوى البلدى .. حيث مازالت هى ضمير المصريين

 كما تجد هناك مقاوى ذات تجمعات مهنيه او ثقافيه محدده مثل قهوه التجاريين او قهوه المشايخ او قهوه الالاتيه يجتمع فيها اصحاب المهنه الواحده يناقشون فيها اوضاع مهنتهم و مشاكلهم المشتركه مثل النقابات المهنيه .

لذا ارى ان القهوه هى الضمير الحى للمجتمع المصرى .. عايزتعمل استطلاع انزل القهوه . عايز تتناقش فى اى موضوع انزل القهوه .. عايز تقعد مع اى حد قابله فى القهوه ... عشان كدا القهوه هى مصر

خالد الحداد

27/1/2014

مادام محجبه أبقى مؤدبه

من أبرز ما أراه من تناقض فى مجتمعنا فكرة الحجاب وإرتباطه بالإيمان والأدب ... زمان ماكنش فيه حجاب .. وكانت البنت بتلبس فساتين واسعه وحمالات و عريان زى ما بنشوف فى الأفلام .. رغم كده عمرنا ما سمعنا عن قضيه تحرش بيهم ولا كان حد يقول انها بنت مش مؤدبه لان الكل كان بيلبس كده وقتها.. ثم ظهر الحجاب فى أواخر السبعينات واوائل الثمانينات بسبب ظهور التيار الإسلامى الذى افرج عنه الرئيس السادات لمواجهه التيار الأشتراكى و سرعان ما بدا فى الإنتشار و أصبحت معظم نساء مصر محجبات .. بل تطور الأمر حتى أصبح من العيب ألا ترتدى البنت الحجاب .. مش مهم هى مقتنعه بيه أو لا ... مش مهم هل ستقدر تلتزم بأدابه وأحكامه ولا لا... مش مهم ... المهم انها ترتديه والا الناس تاكل وشها .. ومش بس كده لا دى كمان تبقى بنت مش مؤدبه ومش كويسه لانها مش محجبه ... و تبدأ البنات صاحباتها يكلموها " هو أنتى مش ناويه تتحجبى ولا إيه ؟؟ البنات فى سنك كلهم محجبات .. انتى ازاى وصلتى للسن دا ومش محجبه ؟؟ " كأن معيار العفه و الشرف هو الحجاب .

تقوم جايه البنت لابسه الحجاب وعلى ايه بقه !!!! على بنطلون جينز ضيق جدا او فيزون مجسمها كانها عريانه و بدى شادد عليها ولافه الطرحه على راسها ولابسه بوت لحد ركبتها يجسمها اكتر .. كانها كده خلاص بقت محجبه .. والتزمت بدينها !!!!!! يا سلام !!!! ماهى أصلا لبسته إرضاء للمجتمع مش إرضاء لله ولا اتباع لتعاليمه لكن اتباع لرغبات المجتمع ايلى فرض عليها تبقى محجبه عشان ماحدش يبصلها بصه وحشه !!!

طب بس كده ؟؟ لا مش بس كده .. تقعد البنت المحجبه وهى لابسه هذا اللبس ( المؤدب ) فى كافيه و تمسك الشيشه و تشد منها انفاس وتطلع دخانها فى الجو زى أى معلم محترف قاعد فى أحسن قهوة .

هل دا هو الحجاب ايلى بتدوروا عليه ؟؟ هل دا الحجاب ايلى بتنادوا البنات تلبسه ؟؟ والغريب انك لما تيجى تتكلم معاها تقولك "ماهو كل البنات بتلبس كده ".. تقولها "طب خلاص إحترمى الحجاب واقلعى الطرحه دى ".. تبصلك بنظرة دهشه غريبه جدا وتقولك "ازاى بقه؟؟ انت عايزنى ابين شعرى للناس !!!!" كان شعرها  دا هو بس ايلى عيب تبينه  وباقى جسمها عادى .. مافيش مشكله فيه .. ممكن تبينه او تعريه.. عادى .. إنما شعرها تؤتؤتؤ عييييب مايصحش .. الناس تقول ايه .. تقول إن فلانه الفلانيه المحجبه المحترمه قلعت الحجاب و إنحرفت !!! يادى النايبه ..

طب سيبنا من البنت .. أهى برضه صغيرة وعايزة تعيش سنها .. تعالى للست العاقله الراسيه الكمل امها وقولها .. "ينفع ايلى بنتك لابساه ده يا حاجه ؟؟".. تفاجىء بالرد المجهز مسبقا " وفيها ايه .. بنت صغيرة وعايشه سنها .. وكمان ماهى كل البنات بتلبس كده .. حتيجى عليها هى يعنى ؟؟؟ وكمان خلى البت تتجوز " كأن البنت لو مالبستش كده مش حتتجوز أو لو كانت كاشفه شعرها مش حتتجوز ؟؟؟

أحب أقولك يا حاجه إن البنت ايلى مجرد الحجاب بالنسبه لها حته قماشه محطوطه فوق رأسها مش بتتجوز بسرعه زى مانتى فاكرة ... بالعكس بتكون أخر واحده ممكن الشاب يفكر فيها لانه بيشوفها متناقضه مع نفسها يبقى ازاى حتقدر تفتح بيت !!!

للأسف ما يراه الشاب الأن جعله يفقد الثقه فى كثير من البنات الآتى يتمسكن بالحجاب لمجرد الشكل او المظهر الإجتماعى وليس للتدين الفعلى الحقيقى الذى يحمى البنت من أى سوء .. و ذلك جعل الشاب يفقد الثقه فى الحجاب ذاته .. فالآن لو قولت لشاب متقدم مثلا لواحده "على فكره دى محجبه حيقولك وإيه يعنى مش دليل يعنى على التدين " وهذا فى حد ذاته خطير جدا .. فنظرتنا السطحيه لركن هام جدا فى الدين جعل الكثر من الناس لا تهتم به على الإطلاق بالعكس أصبحت تشك فيه .

للأسف لقد ربطنا مفهوم الشرف والعفه بمجرد حته قماشه محطوطه فوق الرأس .. وياريت حتى قدرنا قيمه حته القماشه دى .. بالعكس لقد أهاناها و أفقدناها قيمتها وحولناها من غطاء شرعى يحمى البنت لمجرد مظهر من مظاهر التدين الزائف الذى نعيش فيه ..

إيلى عايز أقوله إنه مش كل بنت كاشفه شعرها تبقى بنت منحرفه او مش كويسه ... ولا كل بنت محجبه تبقى مؤدبه ومحترمه .. خلونا نبص للشخص من جوة مش مجرد شكل من بره .. الشكل عمره ما كان بيبين حقيقه الشخص .. ياما شفنا ناس من برة هلا هلا ومن جوة يعلم الله ... خلونا نتعامل مع البنت بعقلها مش بشكلها ولا بجسمها ولا بلبسها.. مش مهم محجبه ولا لا .. المهم تصرفاتها وأخلاقها و تحملها للمسؤليه هو دا المعيار .. لذا انصح كل بنت لو مش حتقدرى تلتزمى بأداب الحجاب من تعامل وأخلاقيات و ملابس أرجوكى أخليعه فأنتى بذلك تشوهى من هى ملتزمه بيه وتشوهى ركن هام جدا فى الدين بل و تدفعى الشباب لفقد الثقه فيه أيضا ...

لا أريد أن يفهم من كلامى أنى اهاجم الحجاب فهو أحد أركان الإسلام الهامه جدا ولكنى أهاجم النظرة السطيحه له ورغبتى ان نخرج من إطار النظرة للشكل إلى النظره للجوهر

لو عليا ... أتجوز اجنبيه

لو جيت سألت أى شاب .. تفضل تتجوز مصريه ولا اجنبيه ؟؟ حتلاقى نسبه 99.9% من الشباب يقولولك " أجنبيه طبعا يا عم .. إنت بتهزر ؟ "

طب يا ترى ايه سبب إقبال الشباب على الزواج من الاجانب أكثر من المصريات ؟؟

هناك عده أسباب لذلك بعضها يرجع إلى عامل إقتصادى و آخر لعامل إجتماعى وثالث لعامل سلوكى.

1.     العامل الإقتصادى :

وفى رأى هو الآهم فيتمثل فى ان الزوجه الأجنبيه يمكن أن تمنح زوجها الإقامه فى بلدها وبذلك يحقق حلمه بالخروج من مصر و الحياه فى دوله أجنبيه من الممكن ان يحمل جنسيتها لو كانت قوانين تلك الدول تسمح بحصول الزوج على الجنسيه ، و أيضا ينظر الشاب ان الزوجه الأجنبيه يمكن أن توفر فرصه عمل له فى بلدها .. وبذلك يكون ضرب عصورين بحجر واحد ( الإقامه والعمل ) .

كما ينظر الشاب إلى الأجنبيه إلى إنها إقتصاديه لا تطلب طلبات كثيرة ولا تحمله مصاريف عاليه مثلما تفعل المصريه من شقه و تجهيز و مهر وشبكه ومؤخر صداق وقائمه و فرح وفستان وكوافير و خلافه من تلك المصاريف التى لا تنتهى ، فبالتالى هى بالنسبه له اكثر توفيرا فى النفقات ، فهى تسكن معه حتى فى غرفه صغيره و بفستان سواريه بسيط ولا تحتاج إلى زفه ولا قاعه ولا خلافه .

2.     العامل الإجتماعى :

اما من الجانب الإجتماعى فالزواج من اجنبيه يجعل صاحبنا إياه بين أقرانه و زملائه زى ما يكون طوق النجاه لهم وكأنه لقى لقيه وخصوصا إنك ستجده بين أصدقائه محط الأنظار بصفته متجوز أجنبيه و طبعا كل واحد من أصحابه حيروحله عشان يلاقيله فرصه عمل عنده فبالتالى يشعر بزياده قيمته الإجتماعيه وسط أفراد مجتمعه سواء الأقارب او الأصدقاء .

3.     العامل السلوكى :

أما العامل السلوكى فستجد ان الأجنبيه سهله فى التعامل مع الجميع وغير معقده بمجموعه من الموروثات القديمه التى تشبعنا بها والتى أكل عليها الدهر وشرب ، هذا كما إنك ستجدها غير مصابه بالنفاق الإجتماعى الذى تصاب به كافه العربيات عموما .. فستجدها واضحه وصريحه معك ولن تحاول أن تتجمل أمامك او تظهر بغير حقيقتها ..

 لا أقول ان كل الأجنبيات كذلك ولكنى اتحدث عن الأغلبيه منهم وهذا بالطبع لا يقلل من دور الزوجه المصريه الأصيله ولكنى أردت أن أكشف عن احد أسباب توجه الشباب للزواج من الأجنبيات على حساب المصريات أو العربيات عموما

خالد الحــداد

24/10/2014

فراشه الحاج مدبولى

مره روحت اعزى في حماه صديق ليا في المنارة في إسكندرية ، والمنار هي  للي مايعرفهاش عباره عن منطقه عمل صوان العزاء لأهل المتوفى قدام كليه الهندسة ، روحت لقيت حوالى 7 صوان موجودين وطبعا كل وصان وله ميكروفون وكل ميكروفون عالي على الاخر وكل مقرئ عمال يعيد ويزيد ويعلى على صوت الشيخ اللي جنبه وفى الاخر ماحدش سامع حاجه منهم كلهم ، ما نبنا إلا الازعاج و الصوت العالي اللي طبعا من غير أي تدبر ولا تركيز في أي حاجه ، المهم عملت الواجب وجيت اروح لقيت تحت البيت عندي برضه صوان عزاء !! قولت في سرى ايه اليوم دا هو دا يوم العزاء العالمي وانا ماعرفش ولا ايه .. المهم طلعت البيت و لسه متغدى واشرب الشاي والاقى صوت المقرئ ما شاء الله عليه ولا عبد الحليم في اغنيه جبار .. حاجه كدا ايه ما لهاش حل ... لدرجه من كتر الصداع اللي سببه ليا قفلت الشيش والقزاز عشان احرم نفسى شويه من صوته الشجي والعذب ، ولقيت نفسى بسأل.. هو ليه دايما في العزاء وفى الشادر بنحط الميكروفون لبرا ويبقى صوته عالي جداااا ؟؟؟ فضل السؤال دا محيرنى لفتره طويله جداا .. وبعد الفترة دى برضه مالقلتوش اجابه وفضل برضه محيرنى ..

الموضوع دا جه على بالى لما مره كنت كانت في البيت لا بيا ولا عليا و جايب لب و عمال اقزقز وانا بتفرج على التلفيزون وآآآخر انشكاح واذا فجاه الاقى صوت مقرئ في شادر تحت البيت .. طبعا مش عايز اقولكم أصلا في البداية صوت المقرىء كان عامل ازاى .. دا غير ان الصوت كان عالى جداااا لدرجه انى قفلت الشباك والقزاز من علو الصوت .

طبعا في ناس حتقعد تقولي يعنى هي جت على الساع هدى يا أخى ، ماتقعد تسمع كلام ربك شويه ولا خلاص الدنيا وخداك ومش قادر تصبر ساعه ولا 2 ، والاقى هجوم ضاااااااااااارى عليا ممكن توصل لحد الرده والعياذ بالله

انا بس عايز افكر حضرتك ان اسمى (خالد) يعنى مسلم والحمد لله وبصلي وبصوم وبعبد ربنا وبعمل ذنوب و بستغفر و ربنا يتقبل بس عايز أسال حضرتك سؤال ...

هل كان دا هو شكل العزاء أيام الرسول عليه الصلاة والسلام ؟؟ هل من العزاء ازعاج الاخرين؟ افرض يا اخى في واحد نايم تعبان او واحد بيمتحن او ست واخده الدواء ونايمه في هدوء او حتى واحد عايز يقعد يتكلم مع مراته وعياله .. ليه تزعجهم أصلا ؟؟ هذا الميت او المتوفى الله يرحمه هل سيعاد الله الحياة كل ما تعلى الصوت ؟؟ هل ستزيد رحمه الله عليه كل ما كان الصوت عالي ؟؟ ابدا والله

يا سيدى وطى صوت الميكرفون شويه او حتى خليه على قدك وقد من في الصوان ، مش لازم تسمع الجيران وجيران الجيران يعنى ، مش بعيد الناس اللى تعبانين دول بدل ما يدعوا للمتوفى بالرحمة يدعوا عليه ، احترم الناس شويه هم مالهمش ذنب في حدوث الوفاه

في ناس حتقول ما هو لازم يعل كدا عشان الناس تنزل تشارك وتاخد بخاطر أصحاب العزاء ، ماشى يا سيدى حمشى معاك على الافتراض دا .. أصلا لو انا عايز انزل العزاء واخد بخاطر اهل المتوفى مش محتاج ميكروفون صوته عالى يخرم طبله ودنى عشان انزل ، و لو انا مش عايز انزل الميكروفون مش حينزلنى .ز يبقى ايه لازمه صوته العالي دا أصلا ؟

بجد حاجه مش مفهومه وغريبه .. وكمان افرض يا سيدى انا مش مستعد دلوقتى اسمع قران ، او مش مهيىء نفسيا في الوقت دا لسماعه او لسه راجع من الشغل وعايز اريح شويه ، ليه تفرض عليا اسمعه بالشكل دا ؟ انت كدا  بتزعجنى وبتيجى على راحتى وحريتى ودا مش من الدين أصلا  لو انت واخد بالك

خلاصه القول لو عايز تعمل صوان اعمله بس اما توطى الصوت او توجه الميكروفون للناس فقط اللى في الصوان بس مش لازم تزعج الناس اللى حواليك بحاله وفاتك .. خلى الناس تدعى لميتك بالرحمه .. ربنا يرحمنا جميعا يا رب

شويه إحباط بالشطه

بقالى فتره مش كبيرة قوى حاسس بنوع من الإحباط والضيق .. ومش عارف ليه !! يمكن بسبب الظروف الإقتصاديه او الأوضاع  السياسيه او بسبب كميه الطاقه السلبيه المحيطه بى والتى أقاوم مرارا وتكرارا حتى لا انساق إليها

وفى كل مره احاول ان أخرج من تلك الحاله السلبيه اجد نفسى أعود لها مجددا .. وطبعا بحكم إنى مدرب ومحاضر تنميه بشريه فمن وجه نظر الناس إنى إزاى أصاب بإحباط أو ضيق !! فالمفروض إنى أكون دائما سعيد وفرحان ومبسوط و منشكح على طول الخط ( على أساس إنى إنسان فضائى لا أعيش على سطح هذا الكوكب إيلى على شكل بيضه )... ما علينا !!

المهم قولت لنفسى طب وانا حفضل كدا كتير ولا إيه ؟؟؟ لو إنت عايز تغير من نفسك فأولا لازم  تغير من حالتك .. وإذ فجأه لقيت نفسى فطيت من على الكرسى وعملت اول خطوة فى التغيير وهى إنى ... حلقت ذقنى .. ثانى حاجه مسكت ورقه وقلم وقعدت اكتب كل ايلى مضايقنى بالضبط فى شكل نقط محدده . بعدها قعدت أحط حلول لكل حاجه مضايقانى ، كل ما اخلص نقطه أنتقل للى بعدها .. بعد كده مسكت ورقه الحلول دى وبدات ارتبها طبقا للوقت وكل نقطه حتاخد منى وقت قد إيه و ايه طرق تنفيذها بالتفصيل .. وبعد كده ربطت بين كل النقط المتشابهه مع بعض وأخر حاجه روحت ماسك ورقه المشاكل دى وقطعتها ورميتها فى أقرب صندوق زباله و أخذت أهم قرار وهو إنى ........... بدأت أنفذ إيلى كتبته

حاولت فى اول نقطه لقيت رد الفعل مش سيىء زى ماكنت متصور .. بالعكس وضحلى حلول تانيه ماكنتش اعرفها وبعدها انتقلت للنقطه الثانيه فالثالثه فالرابعه وكله ماشى زى الفل وفى منتهى الجمال وإذ فجأه ( أن أةةةةةةةةةةةةةة ) واجهت صعوبه فى تنفيذ النقطه الخامسه وحاولت إن احلها فلم استطع وحاولت وحاولت وحاولت وفى كل مره لا استطيع فبدأ اليأس والإحباط يتملكنى مره تانيه ولكن فى تلك المره كنت تعلمت الدرس فتجازت تلك النقطه لما يليها و نجحت فيها وعندما عدت للسابقه وجت حلها فى النقطه التى تليها

طب يعنى إنت عايز تقول ايه بالضبط ؟؟ وإيه كميه النقط دى كلها ايلى انت زهقتنا بيها ... ياعم إحنا مش فاهمين حاجه منك ومن نقطك .

إيلى عايز أقوله إنك طبيعى جدا إنك تحبط ولكن مش طبيعى إنك تستمر محبط .. فإحباطك مش حيوصلك لآى حاجه بل بالعكس حيوصلك من سيىء لآسوا ..وفكر فيها شويه كده مع نفسك .. عشان كده عايز منك تمشى على ايلى حقولك عليه لو عايز تطلع من إحباطك :

1.      غير من طبيعه هيئتك و شكلك

2.      اكتب كل حاجه مضايقاك بالتحديد

3.      بص لكل مشكله وحط لها حلول وبدائل

4.      حط لكل حل وقت زمنى للتنفيذ

5.      نفذ ( أهم نقطه )

6.      قيم نتائج تنفيذ

7.      لو مانجحتش شوف اى نقطه انت مانجحتش فيها و شوف لها طرق تانيه للحل ( خليك مرن ) وماتعممش عدم نجاحك على باقى النقاط

8.      كافىء نفسك على كل نجاح تحققه وخليك واثق ان ربنا بيكافئك على سعيك للنجاح مش على نجاحك ذاته

9.      اشكر كل شخص ساعدك فى النجاح فى اى مرحله حتى لو عملك حاجه بسيطه جدا

10.  حط فى بالك إنك عمرك ما حتنجح من اول مره ولو حصل حتكون مجرد صدفه ماينفعش تبنى عليها كل حياتك

وتذكر إن الله خلقك عشان تنجح .. وخلقك قوى عشان تقدر تتخطى كل العقبات ايلى تقابلك وحط جواك القدرة على تنفيذ المستحيل

فتذكر إنك خلقت من روح الله .. يعنى خلقت من طاقه لا نهائيه .. فالله سبحانه وتعالى لم يخلقك من روحه لكى يشقيك بل ليسعدك

لذا تأكد أن كل امور الله خير .. فالإحباط لم يخلق لك

J

خالد الحداد

3/12/2014